UTU

Nina machache muhimu, ambayo ni ya thamani

Nataka kutakalamu, niyatoe hadharani

Wayafahamu kaumu, marafiki ikhuwani

Ewe kiumbe insani, kuwa mja mwenye utu

Neno ‘UTU’ tufahamu, ni funzo kwetu soteni

Nitawapa kwa nidhamu, kwa mpango wa kanuni

Na tena ni kwa nudhumu, kwa shairi kubaini

Ewe kiumbe insani, kuwa mja mwenye utu

Wema si mali ya mtu, hili tujue yakini

Wala uzuri si kitu, wa umbo lakini mwilini

Kitu aula ni utu, kitu bora duniani

Ewe kiumbe insani, kuwa mja mwenye utu

Na kivazi na kitimu, kwa utu hakilingani

Nguo si kitu adhimu, na kiatu mguuni

Kitu ni ubinadamu, kisokuwa na kifani

Ewe kiumbe insani, kuwa mja mwenye utu

Utu ni kitu adimu, kipawa chake Manani

Utu ni moyo rahimu, heshima yake insani

Na tena ni ukarimu, na roho yenye imani

Ewe kiumbe insani, kuwa mja mwenye utu

Utu sio ujabari, ushujaa wa vitani

Mtu ni utu mzuri, wa tabia na makini

Mwenye utu ni fahari, kwa wake na majirani

Ewe kiumbe insani, kuwa mja mwenye utu

Utu ni khulka njema, maumbile ya nyumbani

Ni ubinadamu mwema, ni ya Mola yake shani

Hima basi ndugu hima, utu ni wetu soteni

Ewe kiumbe insani, kuwa mja mwenye utu

Ya nane ni kaditama, kalamu naweka chini

Ikiwa niliyoyasema, nitakuwa makosani

Tafadhali kwa heshima, nawaomba msamaha

Ewe kiumbe insani, kuwa mja mwenye utu