Lau ingeuzwa hewa

Kahari Mola Manani, Muumba wetu wadudi

Kwako twapomoka chini, kusudi tukuabudi

Umeijaza angani, hewa isioidadi

Mafakiri wangewaje, lau ingeuzwa hewa

Matajiri duniani, bahili walivyozidi

Wangeitia chupani, hewa kisha wainadi

Hewa I moto thumni, na pauni ya baridi

Mafakiri wangewaje. Lau ingeuzwa hewa

Wangelia masikini, kulilia yao sudi

Hasa kwa bei sokoni, ipandishwapo zaidi

Kungezagaa huzuni, na mauko ya fuadi

Mafakiri wangewaje, lau ingeuzwa hewa

Na makwasi madukani, wangeiuza na kodi

Uwapo huna hunani, kununua huna budi

Mana watoto nyumbani, wanakungoja urudi

Mafakiri wangewaje, lau ingeuzwa hewa

Ingetiwa na melini, iuzwe nchi baidi

Ijengewe juu chini, mabohari ya hadidi

Bora yao ni mapeni, iende yao miradi

Mafakiri wangewaje, lau ingeuzwa hewa

Masikini uwanjani, wangepigishwa paredi

Wapige magoti chini, kusujudia malodi

Ndipo itiwe chupani, warushiwe ja samadi

Mafakiri wangewaje, lau ingeuzwa hewa

Elakini Rahamani, achukiaye husudi

Pembe zote duniani, hewa amejaza hadi

Bure waja pumueni, bila malipo kufidi

Mafakiri wangewaje, lau ingeuzwa hewa